
२८ माघ, काठमाडौं । नेकपाका नेता लीलामणि पोखरेलले प्रधानमन्त्री ओलीले जनादेशको अपमान गरेको बताएका छन् । प्रधानमन्त्रीको प्रतिनिधिसभा विघटनको कदमविरुद्ध नेकपाले गरेको विरोध प्रदर्शनमा पोखरेलले ओलीलाई आत्मसमर्पण गर्न बाध्य पार्ने बताए ।
पोखरेलले भने, “देशघाती, जनघाती, पार्टीघाती र संविधानघातीहरुलाई आत्मसमर्पण गर्न बाध्य पार्नेछौं ।” उनले प्रधानमन्त्री ओलीले जस्तो जनादेशको अपमान आफूहरुले नगर्ने र कुनै कमजोरी भएका भए त्यसका लागि पनि माफी माग्ने बताए ।
“जनताका बीचमा हामी कबुल गर्छौं हामी गल्ती गर्ने छैनौं,” पोखरेलले भने, “हामीले गल्ती गरेका छौं भने पनि जनतासँग माफी माग्न तयार छौं ।” पोखरेलले प्रधानमन्त्री भएपछि ओलीले पार्टी र जनता सबैमाथि घात गरेको बताए ।
“नेपाली जनताको विश्वासको पुरा गर्न दिएको जिम्मेवारी केपी शर्मा ओलीले उल्लंघन गरेका छन्,” पोखरेलले भने, “संसद् विघटनसँगै जनयुद्ध र जनआन्दोलनका उपलब्धिहरु छायामा परेका छन् ।”