बालकुमारी घटनाबारे मन्त्री प्रकाश ज्वालाले दिए बयान

एनएमबि न्युज डेक्स,काठमाडौँ
माघ २६ शुक्रबार

बालकुमारी घटना जाँचबुझ आयोगमा भौतिक पूर्वाधार तथा यातायात मन्त्री प्रकाश ज्वालाले सिंहदरबारस्थित आयोगको कार्यालयमा गएर बयान दिएका छन् । गत पुष १३ गते ललितपुरको बालुकमारीमा प्रहरीको ‘घातक’ बल प्रयोगबाट वैदेशिक रोजगारीमा जान चाहने अछामका वीरेन्द्र शाह र दैलेख घर भएका सुजन रावतले ज्यान गुमाएका थिए । प्रदर्शन स्थलमा अकस्मात् भौतिक पूर्वाधार तथा यातायात मन्त्री प्रकाश ज्वाला उपस्थित भएपछि भिड थप आक्रोशित बनेको थियो। साथै मन्त्री ज्वाला चढ्ने बा।२ झ ५८६१ नम्बरको गाडी पनि प्रदर्शनकारी हरु ले जलाएका थिए ।प्रदर्शन स्थलमा जानुको कारणबारे मन्त्री ज्वालासँग आयोगका पदाधिकारीले बयान लिएका हुन् । मन्त्री ज्वालाले बालकुमारीस्थित कान्तिपुर गार्डेनमा आफ्नो पार्टी नेकपा एकीकृत समाजवादी को बैठकमा पुस ११ र १२ मा लगातार गएको र त्यसदिन पनि ‘नर्मल होला’ हेतु ले आफु गएको पदाधिकारीहरूसँग बताएका छन् । उनले भनेका छन्–‘परिस्थिति नर्मल होला भन्ने भयो, त्यस्तो होला भन्ने आकलन नै गरिएन ।’नेकपा एकीकृत समाजवादी ले आफ्नो दलको बैठकबारे स्थानीय प्रहरीलाई जानकारी नगराएको छानबिनबाट थाहा भएको छ । त्यस्तै, जिल्ला प्रहरी परिसर ललितपुरले बैठक स्थलमा सुरक्षाकर्मी नखटाएको आयोगको निष्कर्ष छ । आयोगका एकजना सदस्य भन्छन्–‘मोटरसाइकलमा प्रहरी परिचालन गरेको प्रहरी अधिकृतहरूको जिकिर छ तर, सीसीटिभी फुटेज जाँच गर्दा बैठक स्थलमा स्थानीय प्रहरीको उपस्थिति देखिएन ।’सशस्त्र प्रहरी बलको तर्फबाट घटनास्थलमा दुई राउन्ड अश्रुग्याँस मात्र प्रहार भएको छानबिनबाट खुलेको छ । बालकुमारी घटना जाँचबुझ आयोगले अहिलेसम्म ४१ जनासँग सोधपुछ र बयान लिएको छ । आयोगका अध्यक्ष पूर्व न्यायाधीश शेखर पौडेल भन्छन्– ‘४१ जनासँग बयान लिने र कागज गर्ने काम सकेका छौँ ।’आयोगको आग्रहमा मन्त्रिपरिषद्ले १५ दिनको म्याद थप गरेको छ । आयोगको म्याद फागुन ५ मा सकिन्छ ।किष्ट अस्पतालमा मृत्यु भएका सुजन रावतलाई गोली नलागेको पुष्टि भएको छ । रावतको मृत्युको कारण ‘ब्लन्ट फोर्स इन्जुरी’ बाट भएको चिकित्सकहरूले पोस्टमार्टम रिपोर्टमा उल्लेख गरीएको छ । रावतको मृत्यु दौडिँदा ठोक्किएर, ग्याँस सेलले लागेर वा लाठी प्रहारबाट हुनसक्ने विश्लेषण गरिएको छ ।