'
१७ भदौ, काठमाडौं । नेपाल र बंगलादेशबीच कोरोना भाइरस (कोभिड–१९) को अहिलेको संकटको समयमा पनि सहकार्य बलियो बनाएर अगाडि बढ्ने सहमति भएको छ । प्रधानमन्त्री केपी शर्मा ओली र उनका बंगलादेशी समकक्षी शेख हसिना वाजेदबीच मंगलबार २ देशका अत्यावश्यक विषयमा थप सहकार्य गर्ने सहमति भएको हो ।
प्रधानमन्त्री ओली र वाजेदबीच भएको टेलिफोन वार्तामा २ देश बीचको सम्बन्धका विभिन्न पक्षमा छलफल भएको थियो । प्रधानमन्त्री ओलीले हामीले २ देशबीच व्यापार, ऊर्जा, पारवहन लगायत अन्य आवश्यकीय क्षेत्रलाई प्राथमिकता दिँदै सहकार्य वृद्धि गर्ने विषयमा जोड दियौं भन्दै टेलिफोन वार्तामा भएका कुराकानीबारे उल्लेख गरेका छन् ।
विद्युत् उत्पादनमा सहयोग, ग्रिड कनेक्टिभिटी र नेपालबाट बंगलादेशलाई बिजुली आपूर्ति गर्नका साथै २ देशबीच अवरोधरहित सन्तुलित व्यापारको प्रवद्र्धन, बंगलादेशको पारवहन सुविधामा सुधार, पर्यटन प्रवद्र्धन र अन्य विषयमा समेत छलफल भएको परराष्ट्र मन्त्रालयले जनाएको छ । प्रधानमन्त्री ओलीले रोहनपुर हुँदै बंगलादेश पुग्ने रेल्वे मार्ग विस्तार गर्न अनुमति दिएकोमा धन्यवाद व्यक्त गरे ।
वार्ता फलदायी रहेको जानकारी दिँदै प्रधानमन्त्री ओलीले नेपालको कृषि बालीका लागि अत्यावश्यक वस्तुका रूपमा रहेको युरिया मल पठाउन नेपालले गरेको आग्रहलाई सकारात्मक रूपमा लिएका बताए । यस विषयमा बंगलादेशले नेपाललाई सहयोग गर्ने प्रतिबद्धता प्राप्त भएको छ ।
नेपालमा भइरहेको कोरोना नियन्त्रणको प्रयास प्रभावकारी रहेको भन्दै बंगलादेशका प्रधानमन्त्री हसिनाले प्रशंसा गरिन् । उनले बंगलादेशको कृषि क्षेत्रको सफलताको कथाबाट फाइदा लिनसक्ने औंल्याइन् । वार्ताका क्रममा पछि फिर्ता गर्ने शर्तका आधारमा ५० हजार टन युरिया मल पठाउन सहमति भएको छ । मल ढिला आउँदा नेपालको धान बालीलाई प्रतिकूल असर परिरहेको बेला नेपालका लागि यो ठूलो सहयोग हुनेछ ।
भारत लगायत सार्क मुलुकबाट आउने गरेको युरियासहित मलको आयात यसपटक कोरोना संकटका कारण प्रभावित बनिरहेको छ । यसका कारण प्रधानमन्त्री ओलीले फोन गरेरै मित्रराष्ट्र बंगलादेशलाई तत्काल मल पठाइदिन आग्रह गरेका हुन् । यस सिजनमा हुर्कंदै गरेको धान बालीका लागि मल अत्यावश्यक पोषण हो । प्रधानमन्त्री ओलीले बंगबन्धु शेख मुजिबुर रहमानको जन्म शताब्दीको अवसरमा बंगलादेशी समकक्षी, त्यहाँको सरकार र बंगलादेशका जनतालाई बधाई समेत दिए ।
कोभिड–१९ महामारीविरुद्ध आफ्ना सरकारले गरेको प्रयासका अनुभव साटासाट गर्दै यो खतरा रोक्न सहयोग गर्ने विषयमा पनि २ देशबीच सहमति भएको छ । सो क्रममा बंगलादेशले अपनाएको कदमको सराहना गर्दै कठिन घडीमा नेपाललाई औषधिसहित मेडिकल सामग्री सहयोग गरेकोमा प्रधानमन्त्री ओलीले कृतज्ञता व्यक्त गरे ।
नेपालमा सम्पन्न चौथो बिम्स्टेक शिखर सम्मेलनको स्मरण दुवै प्रधानमन्त्रीले गरे । बंगलादेशका राष्ट्रपतिको भ्रमणपछि सम्बन्ध अझ प्रगाढ बनाउन, प्रवद्र्धन गर्न र सुखद बनाउन उच्च स्तरीय भ्रमणलाई महत्त्व दिएको धारणा दुवै प्रधानमन्त्रीले व्यक्त गरे ।
नेपाल र बंगलादेशबीच सन् १९७२ देखि औपचारिक कूटनीतिक सम्बन्ध स्थापना भएको हो । आपसी सहमति सहकार्य, अपनत्व र भाइचाराका रूपमा २ देश बीचको सम्बन्ध अगाडि बढ्दै आएको छ ।
नेपाल र बंगलादेशबीच वाणिज्य र आर्थिक सम्बन्ध पछिल्लो समय फस्टाउँदै गएको परराष्ट्र मन्त्रालयले जनाएको छ । २ देशबीच व्यापार विस्तार र विविधीकरण गर्ने विशाल सम्भावना रहेकाले त्यस विषयमा २ देशका सरकारबीच यस विषयमा सहकार्य गर्न पहल समेत भइरहेको छ ।
नेपालबाट बंगलादेशमा पहेंलो दाल, तेल, अलैंची, गहुँ, तरकारीको बीउ, हस्तकलाका सामग्री, पस्मिना उत्पादन लगायतका वस्तु निर्यात हुन्छन् । बंगलादेशबाट औद्योगिक कच्चापदार्थ, रसायन, कपडा, जुट, विद्युतीय सामग्री नेपाल आउनेगर्छ । सन् १९९७ मा काँकरभिट्टा–फूलबारी–बङ्गलाबन्ध ट्रान्जिट मार्ग खोलिएपछि बंगलादेशले नेपाललाई मंगला बन्दरगाहको सुविधा उपभोग गर्न अनुमति दिएको थियो ।
रोहनपुर–सिन्घवाद हुँदै नेपाललाई रेल्वे करिडोरको समेत सुविधा उपलब्ध गराएको छ । २ देशबीच अर्थ मन्त्री स्तरमा सन् १९७८ मा संयुक्त आर्थिक आयोग गठन भएको थियो । बैंक, वित्तीय, बीमा जस्ता संयुक्त लगानीका क्षेत्र आपसी सहयोगका क्षेत्र हुन् । रेडिमेट गार्मेन्ट, छालाका सामान, फर्मास्युटिकल्स र पीभीसी पाइपको क्षेत्रमा नयाँ पहल भइरहेको छ ।
नेपाल–बंगलादेश बीचको तेस्रो वाणिज्य सचिव स्तरको बैठक सन् २०१६ मा ढाकामा भएको थियो । सचिव स्तरको प्राविधिक समितिको बैठक पनि २०१७ मा भएको थियो । गत वर्ष बंगलादेशका राष्ट्रपति मोहम्मद अब्दुल हमिदले नेपालको पाँचदिने पर्यटकीय अवलोकन भ्रमण गरेका थिए । सो क्रममा विविध क्षेत्रमा २ देशबीच सहकार्य गरेर जाने प्रतिबद्धता उनले जनाएका थिए । गोरखापत्र दैनिकमा खबर छ ।
एनएमबि न्यूज युटयुबमा पनि उपलब्ध छ । तपाई यहाँ क्लिक गरेर सब्सक्राइब गर्न सक्नुहुनेछ । साथै फेसबुक र ट्वीटरमार्फतपनि हामीसँग जोडिन सक्नुहुनेछ ।
नेपालमा कोेरोनाबाट थप २४ जनाको मृत्यु, मृतकको संख्या ९८४ पुग्यो
२०७७ कार्तिक १७ गते सोमवार
टेलिभिजन फेरेर ‘सक्किगोनी’ प्रसारणमा आउने
२०७७ कार्तिक २५ गते मङ्गलवार
ओली पक्षको वृहत् कार्यकर्ता भेला कमलादीमा
२०७७ पुष १८ गते शनिवार
झारफुकको नाममा २३ वर्षीय महिला बलात्कार गरेको आरोपमा मुस्लिम धर्मगुरु पक्राउ
२०७७ मङ्सिर ११ गते बिहिवार